अहमदाबाद । इन्डियन प्रिमियर लिग (आईपीएल) अन्तर्गत शुक्रबार मुम्बई इन्डियन्स र गुजरात टाइटन्सबीच दोस्रो क्वालिफायर खेल हुँदैछ । खेल अहमदाबादको नरेन्द्र मोदी स्टेडियममा साँझ ७:४५ बजे सुरु हुनेछ । विजेता टोलीले मे २८ मा महेन्द्र सिंह धोनीको कप्तानीमा रहेको चेन्नई सुपर किंग्ससँग फाइनल खेल्नेछ भने हार्ने टोलीको यात्रा यहीँ समाप्त हुनेछ ।
मुम्बई इन्डियन्स लिग चरणपछि अंक तालिकामा चौथो स्थानमा रहेको छ । टोलीले १४ खेलबाट ८ जित र ६ हारसहित १६ अंक जोडेको छ । रोहित शर्माको नेतृत्वमा रहेको टोलीले एलिमिनेटरमा लखनउ सुपरजाइन्ट्सलाई ८१ रनले पराजित गर्दै क्वालिफायर–२ मा प्रवेश गरेको हो ।
टोली १०औं पटक प्लेअफमा पुगेको छ, टोलीले प्रतियोगिताको शीर्ष ४ चरणमा अहिलेसम्म १९ खेल खेलेको छ । उसले १३ मा जित र ६ मा मात्र हार बेहोरेको थियो । गुजरातविरुद्धको टोलीमा ४ विदेशी खेलाडी क्यामरुन ग्रीन, जेसन बेहरेनडर्फ, टिम डेभिड र क्रिस जोर्डन हुन सक्छन् । यसबाहेक ब्याटिङ पिच हेर्दा अलराउन्डर ऋतिक शोकिनको स्थानमा विशेषज्ञ स्पिनर कुमार कार्तिकेयलाई मौका मिल्न सक्छ ।
साविक विजेता गुजरात टाइटन्स लिग चरणको शीर्ष स्थानमा रहेको थियो । टोलीले १४ खेलमा १० जित र ४ हारबाट २० अंक बनाएको थियो, तर क्वालिफायर-१ मा टोलीले चेन्नई सुपर किंग्ससँग हार बेहोरेको थियो ।
टोलीले फाइनलमा पुग्ने दोस्रो मौका पाएको हो । गुजरातले आजको खेलमा घरेलु मैदानको फाइदा उठाउन सक्छ। यहाँ टोलीले अहिलेसम्म ८ खेल खेलेको छ जसमध्ये ५ खेलमा जित निकालेको छ ।
मुम्बई विरुद्ध गुजरातका ४ विदेशी खेलाडी राशिद खान, नूर अहमद, डेभिड मिलर, दासुन शानाका र अल्जारी जोसेफ हुन सक्छन्। टोलीले दर्शन नल्कांडेको स्थानमा शिवम मावी वा अभिनव मनोहरलाई मौका दिन सक्छ भने शनाकाको स्थानमा जोसेफलाई मौका दिन सक्छ ।
मुम्बई इन्डियन्सले आफ्नो १०औं प्लेअफमा चौथो क्वालिफायर-२ खेल्नेछ । पहिले टोली तीन पटक क्वालिफायर–२ मा प्रवेश गरेको थियो । त्यसमध्ये टोलीले २ जित र १ हार बेहोरेको थियो ।
टोली सन् २०११ मा रोयल च्यालेन्जर्स बैंग्लोरसँग पराजित भएको थियो । २०१२ देखि टोलीले २ वटा क्वालिफायर-२ खेलेको थियो । जसमा दुबै खेल जित्न सफल भएको थियो । २०१३ मा टोलीले राजस्थान रोयल्स र २०१७ मा कोलकाता नाइट राइडर्सलाई हराएको थियो।
अर्कोतर्फ, गत वर्ष आईपीएलमा सामेल भएपछि गुजरातले पहिलो पटक क्वालिफायर-२ खेल्नेछ। गत सिजन टोलीले पहिलो क्वालिफायर र फाइनल जितेर ट्रफी उचालेको थियो।
प्रतियोगिताको लिग चरणमा यी दुई टोली अहिलेसम्म तीन पटक भिडेका छन्, जसमा मुम्बईले दुई पटक जितेको छ भने गुजरातले एक पटक जितेको छ। यस सिजनमा दुवै टोलीले एक–एक खेल जितेका थिए । तर अहमदाबादमा भएको खेल गुजरातले जितेको थियो ।
