बन्दुक हिंसा नियन्त्रणको माग गर्दै विरोधमा उत्रिएका टेनेसी राज्यका दुई जना सांसद निष्कासनमा परेका छन् । राज्यका रिपब्लिकन सांसदले उनीहरूलाई निष्कासन गर्नेसम्बन्धी प्रस्तावलाई झिनो मतले स्वीकृत गरेपछि डेमेक्र्याटिक सांसद निष्कासनमा परेका हुन् । सोही दलका अर्का एक जना सांसद भने निष्कासनबाट जोगिएका छन् ।
हालै न्यासभिलस्थित एक प्राथमिक विद्यालयमा भएको गोलीकाण्डको प्रतिवाद गर्दै बन्दुक नियन्त्रण हुनुपर्ने आवाज उठाएका अश्वेत सांसद निष्कासनमा परेका हुन् । उनीहरूसँगै आवाज उठाएकी एक जना श्वेत सांसद भने निष्कासनबाट बचेकी हुन् । उनी एक मतले निष्कासनबाट जोगिएकी हुन् ।
निष्कासनमा परेका सांसदद्वयले आफूहरू राजनीतिक प्रतिशोधको शिकार भएको आरोप लगाएका छन् । गम्भीर दुर्व्यवहारको आरोप लागेका सांसदलाई सजाय दिन आरक्षित कानुनलाई राजनीतिक हतियारका रूपमा प्रयोग गरेर आफूहरूलाई निष्कासन गरिएको दाबी उनीहरूले गरेका छन् ।
